GIUSEPPE RIVELLI (Napoli, 1783 – 1860)

PORTAME, NINNO MIO, DE VINO DOCE 

Portame, ninno mio, de vino doce
n’arciulo chino, ca lo cannarone
mme sento sicco e non po’ ascì la voce.
Primma de tutto anneva lo tremmone
inche diece becchiere d’acqua fresca;
mo che tuorne t’abbusche no testone.
Fatt’ajutà da Porzia o da Francesca,
inche cinco becchiere de gragnano,
e co ll’acqua annevata acconcia e mmesca.
Sollevà mme po Bacco chiano chiano
da lle sciamme che mm’ardeno lo pietto,
si pe mme fa sciacquà stenne la mano.
Tu mme siente, ammalora? j ccà t’aspetto;
portame chillo soleto becchiero,
ca nnante a te a no sciato me lo jetto.
Non fa ll’ommo saccente, e lo penziero
miette a chello che faje, fora besbiglio,
ca po volimmo pazzià da vero.
Siente, guaglione mio, che comm’a figlio
te tengo, mo abbesogna fare annore
a Bacco co lo canto; e te conziglio
a vvevere co ssinno ’nfì a che muore.