LIBERO BOVIO (Napoli, 1883 - 1942)

BRINNESO

Brinneso alla salute
dell’amirosa mia ca s’è sposata!
’E cummarelle meie, ca ’nce so’ ghiute
diceno ca pareva una popata...
Ed indi poi noi li facciamo un brinneso
alla per noi difunda donna amata.

Vino vinello,
se per la donna il mascolo è un trastullo,
io ho stato l’allirchino e il purginello...
Ma rido e abballo,
e me ne frocoleio della mia bella,
ché a queste scemità nci ho fatto il callo!...

Col càlicio levato
me conto tutt’ ’e llacreme chiagnute
per te, dorge ed indegno oggetto amato,
ca t’ê pigliato giuventù e ssalute...
Vevite, amice: chisto è vino ’e Proceta...
’n’atu bicchiere, e nce ne simmo jute...

Vino sincero,
ho detto al cuoro, al povero mio cuoro:
Chiagne pe’ cunto tuio, ca j’ mo sto allero...
Pecché, a chest’ora,
mentre tu fai l’Otello, e ti disperi,
forse la signorina... è già... signora...

Mo ca sto frasturnato
nun me lassate sulo miez’ ’a via...
V’aggio fatto spassà… mi ho dispendiato...
mo purtateme a’ casa ’e mamma mia.
E alla mia vecchia, vuie l’avita dicere:
«Questa crapa è tuo figlio». – E accussì sia!...

Vinello puro,
mentre gli sposi stanno cuoro a cuoro,
che scherzo a presentarse dint’ ’o scuro!...
Alla «signora»
io le direbbe: Nun avé paura...
«Io sono un morto che cammina ancora».

Voglio anch’io, in conclusione, brindare agli amici affinché possano afferrare quest’attimo fuggente e godere della vita e dei suoi piaceri, primi fra tutti vino russo a zzeffunno / vase ’e femmene belle.

Brinnese

Ddoie cose, ’ncopp’ ’o munno,
fanno avutà ’e ccervelle:
vino russo a zzeffunno,
vase ’e femmene belle.

’O vino te ’mpupazza,
ma arape tutt’ ’e pporte.
Nu fiasco ’e sta bbubbazza
acconcia ’e ccose storte.

Te fa cantà cu ’a voce
chi tene ’o male ’e mole,
te fa cchiù rrosse e ddoce
’e vvocche d’ ’e ffigliole.

E ogne vaso sana
meglio ’e na mmedicina;
vase ’e bellambriana
ca sanno ’e falanghina.

Chesta è ’a ricetta e ’a ddosa
ca fa campà cient’anne:
ll’anema s’arreposa
scurdannose ’e malanne.

E si chesto ce resta,
amice mieie, curaggio,
stateve sempe ’nfesta
ch’ ’a vita è nu passaggio.

Acqua passata è aiere,
e ll’ogge stà ’mpartenza.
Aizate sti bicchiere:
dimane Ddio ce penza!

Cu bbona salute.